TELVE – FASSA 22 ottobre 2017

Telve – Fascia 1 – 2 (goi de Gabriele Riz e Pietro Kola)

Formazion del Fascia: Colusso Alessandro, Bernard Manuel, Trottner Luca, Deflorian Giovanni, Cincelli Patrick, Debertol Cristoforo, Lorenz Matteo, Cigolla Patrizio (20’ s.t. Zanoner Dimitri), Riz Gabriele (35’ s.t. Aleksi Julian), Riz Gianni, Kola Pietro.

Dò trei desfates de seghit l’é ruà endò na bela venta per la pruma squadra del Fascia che sabeda sera, sul senester ciamp de Telve, à palesà de poder se la jièr delvers ence contra formazions più espertes e fisicamenter più fortes, metan te ciamp de contra svelteza e tecnica zenza ampò fèr con demanco de chela gaissa che no cogn mai mencèr.

La partida se prejentèa desche una de la più senestres de la ultima setemènes ajache Telve l’é semper stat n aversarie zach e soraldut, aldò de la ultima trei partides zenza ponc, no se podea assolutamenter per perder amò. N peis psicologich chest piutost grief da se tor dò, amò de più per na formazion tant jona desche chela fascèna che, ence te cesta ocajion desche ormai dal scomenz del campionat, à vedù mister Chelodi fèr jièr dal prum menut trei joegn de dejeset egn con na età media de squadra de vintetrei, uzèda mingol demò da Debertol, Bernard e Cigolla che a chest bel grop de joegn i proa a dèr mingol de esperienza e coraje.

Canche l diretor de jech dèsc l via, i ladins somea no sentir l druch de l’importanza de chesta endesfida e te nience diesc menuc i troa l vantac de gra a Gabriele Riz asvelt a tor l temp al portier de cèsa, su na trata da mezciamp de Debertol. No podea esser scomenz mior se no fossa che cinch menuc dò su na malsegureza de la defendura fascèna, l Telve fèsc ite l’un a un. Chesta parità troèda sobito peta n’atim jù de moral i bec del Fascia che per n chèrt de ora subesc la prescion dei valsuganoc, ampò zenza risćèr nia. Passà che l’é stat chest moment, i ladins i à metù ensema da nef mingol de bon jech troan n par de ocajions falèdes de pech dai atacanc. Al carantacincheisem l resultat l’é restà chel dei prumes menuc, un a un.

Te la seconda pèrt de garejèda l Fascia l’é ruà te ciamp con maora gaissa respet ai aversaries e à proà più che n’outa a troèr l gol del vantac, soraldut atacan su la man cència olache Gabriele Riz fajea doentèr mat l terzin de cèsa. Dintorn a la metà del secondo temp l’é ruà ence n azident al jeneie per l bravo numer diesc del Telve che à coscì cognù lascèr l ciamp lascian i compagnes zenza regist del jech, e Lorenz e sozi ne à sobito tout profit ciapan te man dut l jech te mezciamp e spenjan inant amò de più enscin al gol del doi a un a diesc menuc dal nonanteisem. Trata dal cianton de Debertol, spona de Trottner e trata de cef de Kola dant che l portier ruasse a meter man su la bala. Troà l vantac l Fascia à vardà de se serèr delvers tedò per no conzeder nia e proan a sciampèr en contratach ampò, de contra a la gran concentrazion te la defendura l’é vegnù manco la gestion dei contrataches olache se aessa podù serèr sù la endesfida dant de la fin. Chest fosc un di pec aspec negatives de chesta partida e che seguramenter l’alenador fascian tolarà cà per ge lurèr sù. Enstouta con n spirit positif ajache i trei ponc i é stac vadagné.

Chesta domenia da mesa les trei, de contra al Calceranica, i joegn del president Ghetta proarà a venjer la pruma partida sul ciamp de cèsa.

Rejonan de la squadra mendres, metan da na man la desfata de vender ai 20 de otober de la Juniores contra l Telve, l’é stat n fin de setemèna dassen bon. I Arleves à vent à vent 3a2 contra l Borgo ( 2 goi de Riz Lorenzo, 1 de Debertol Jannes), i Giovanissimi à vent 5a1 contra la Solandra (5 goi de Lorenz Massimo), i Esordienc “A” à vent 3a0 contra i Solteri.

Chesta sabeda, la Juniores jia a Vich da mesa les set contra contra l’Oltrefersina, i Arleves a la medema ora a Levico. Domenia i Esordienc “B” jia a Vich da mesa les unesc contra la Dolasiana. Giovanissimi e Esordienc “A” i paussa.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close