REDIVAL – FASSA 5 novembre 2017

Redival – Fascia 1 – 2

Formazion del Fascia: Colusso Alessandro, Bernard Manuel, Trottner Luca, Deflorian Giovanni, Cincelli Patrick (35’ s.t. Cincelli Federico), Debertol Cristoforo, Lorenz Matteo, Cigolla Patrizio (25’ s.t. Pezzei Michael,) Riz Gianni (20’ s.t. Toma Nicolas), Zanoner Dimitri (20’ p.t. Kola Pietro), Riz Gabriele (37’ s.t. Rasom Pierpaolo).

A ve contèr de chesta partida, fajessa segur miec Giorgio Martino o Fabrizio Failla piutost che l sotescrit. Zachei fosc i li cognosc, ma per chi no sà chiche l’é, chisc l’é i doi miores giornalisć per chel che vèrda l jech del “balon te nodadoa”. Jà, perché chel che l’é stat jià sul ciamp de Celledizzo, no se pel proprio l chiamèr jech del balon, ajache la gran pievia aea fat doentèr l teren de jech na gran poza de èga. Ampò, i ladins che se aea sorbì beleche trei ores de viac, no aea chela de se n jir zenza jièr per cogner fèr l viac n’autra outa, e a la dir duta ence i patrons de cèsa i spenjea per jièr. Coscì l diretor de jech no à abù da dir de contra e da mesa les trei à dat l via a la endesfida.

Se tel pensier dei jiadores l’era chela de poder a zeche vida jier delvers, dò pec menuc se à entenù che coscita no la fossa stata ajache la bala la se fermèa dassen a ogne pas, ampò la doi squadres no les se à trat endò e les à proà te ogne vers a aer la soramessa su l’autra. E dut somà, se pel dir che l Fascia à venciù l prum temp e che l Redival à venciù i secondi carantacinch menuc. En pràtega l jech l’é stat comanà semper da la formazion che defenea da la man del ciamp olache l’era più poc de èga.

Sul jech no se pel dir segur n muie ajache massa condizionà da la pievia tant da doentèr de la outes mingol comich. Ampò l Fascia a la fin dei nonanta menuc à vent doi a un se portan a cèsa trei ponc fondamentèi per chest campionat. E chest de grà a doi bela jièdes ruèdes tel prum temp. La pruma aldò de na bela azion pontèda via su la man dreta da na trata auta de Debertol per Gianni Riz che dò aer passà via l terzin, à trat dedant usc na bala che cogne demò esser spenta ite. Dut sorì se sà, ma se cognea esser tel post giust al moment giust e Gabriele Riz l’era. Un a nia. L’é passà pec menuc e endò Gabriele a troà l troi del gol, enstouta co na gran azion solenta. Dò aer metù jù na trata de Debertol su la man cencia, l joen da Ciampedel à sutà n prum defensor, n secondo e per finir ence l portier. Doi a nia. A la fin del temp dapò l’é ruà ence l cartelin ros per l portier de chi de cèsa per n fal fat su Kola che jia soul contra l’usc vet. A la paussa dut penea da la man del Fascia ma co na situazion de ciamp coscì, ence con doi goi e n om de vantac no se podea esser massa segures. Defati l secondo temp l’é stat dut per chi de cèsa che i podea spenjer da la man miora del ciamp e che nia aea più da perder. Aboncont Bernard e sozì, enceben che te la fasa de atach no doentèa nia, à semper tegnù dur te la defendura, ciapan de bona paches ma risćian demò n par de outes. L gol del doi a un l’é ruà demò a la fin anter l’auter su na posizion de neto forajech.

L triple scìgol del diretor de jech l’é stat na liberazion e na gran festa per i jiadores de Chelodi che à portà via da n ciamp dassen senester na bela e soralud emportanta venta.

Chesta domenia l Fascia jia a Vich contra la pruma de la clas, l Borgo, che enscin ades à vent duta la partides fajan 38 goi e n ciapan demò 4. Na partida empossìbola se volon ma proprie per chest dassen bela da jièr.

Per chel che vèrda la squadra mendres, demò i Giovanissimi de mister Giuliani à vent: 6 a 3 con l’Arco (goi de Massimo Lorenz 3, Alex Rasom 2, Simone Rasom). I Arleves à parejà 2 a 2 contra l Piné (goi de Jannes Debertol e Alessandro Sorarù), la Juniores à perdù 3 a 2 contra l’Audace (goi de Fabio Bernard e Mario Toma). I Esordienc “A” à perdù e i Esordienc “B” à parejà.

Chesta sabeda, i Arleves jia da mesa les trei a Cembra, i Esordienc “B” da les cater a Vich contra l Fiem, i Esordienc “A” da les cinch a Perjen, da la medema ora i Giovanissimi jia a Cloz contra l’Anaune e da mesa les set a Vich la Juniores jia contra i Solteri.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close