PINE’ – FASSA 2 APRILE 2017

Piné – Fascia 1 – 2 (goi de Porcu e Dallio)

Lorenz, Bernard, Trottner, Deflorian Gio., Dallio, Debertol, Porcu, Pezzei, Amplatz (20’ p.t. Toma), Cigolla (1’ s.t. Petrone), Zanoner (35’ s.t. Kola).

L’é ruà na gran bela venta domenia passèda per la pruma squadra del Fascia Balon che, su n ciamp semper senester desche chel de Baselga, à batù i parons de cèsa per doi a un de gra ai goi de Davide Porcu e Riccardo Dallio.

Che fossa stat na endesfida dassen ria i ladins i lo saea jà dantfora ajache i pinaiteres é semper stac aversaries zaches, ma n’outa rué sul ciamp Mille Pini, Trottner e compagnes se à troà sot i piesc n teren che someèa più a n ciamp de pomes de tera che de balon e chest à sobito lascià entener che fossa stat nonanta e passa menuc de batalia più che de jech.

Ampò, enceben n teren de jech sotessora, i prumes vint menuc de partida à vedù n Fascia dominèr e schicèr l Piné te sie mezciamp troan una dò l’autra dotrei ocajions che aessa podù porter i fascegn sobito en vantac de amancol doi goi. Purampò desche jà sozedù te la passèda endesfides, l cinism no l’é la miora calità dei bec del president Ghetta e aldò del la bona ocajions l’é ruà n gol soul de grà a Porcu asvelt a utèr te usc n bel passaje de Dallio da man cencia. L vantac arjont someèa poder dèr na neta direzion a la partida se no fossa che n’azident a Amplatz che à cognù lascèr l ciamp e l mudament tatich che l’é vegnù aldò, à portà mingol de confusion tei unesc de Fascia che ence per via de vèlch sortida falèda da man de Lorenz, i se à trat mingol endò e à padì i ataches del Piné che dò aer ciapà n remenat aut, proprio su n eror del portier fascian à troà l pont de l’un a un a serèr sù i prumes carantacinch menuc de jech.

Iniré per no aer metù al segur l resultat al scomenz de la endesfida canche dut jia delvers, i joegn de Fascia a pontà via l secondo temp co la medema gaissa del prum e à fat valer la maora voa de se vadagnèr i trei ponc, troan al sesanteisem l gol del doi a un. Bela combinazion su la man cencia anter Petrone e Dallio con chest ultim che volan trèr la bala te mez a l’area, à troà n trata che à gabolà duc lascian l portier de cèsa cet.

N’outa arjont l vantac i ladins se à serà tedò vardan de no conzeder più nia ai atacanc pinaiteres e proan vèlch outa a bechèr en contratach. Fajan coscì, te l’ultima mesora segur no se à vedù n bel jech ampò chi che l’era su la tribunes à podù mirèr n Fascia che no à mai molà, che à scombatù su ogne balon ge lascian ai ghesć na soula ocajion sutèda fora mingol adinfal olache ampò Lorenz se à rifat ite dal prum temp mingol mèlsegur, seran sù l’usc con segureza.

Al triple scìgol del diretor de jech i fascegn à podù petèr fora la legreza per na venta dassen importanta, tant per la clasifica olache i ladins à passà via l Vattaro che per dèr seghit ai resultac positives de la ultima partides. No l’era defati mai sozedù te chest campionat che l Fascia metesse una dò l’autra cater partides zenza perder. E na bona ocajion per jir inant su chesta strèda la rua chesta domenia ajache sul ciamp de Vich rua sù la Cauriol.

Per chel che vèrda la squadra mendres, i Arleves à batù la squadra “B” del Lavis per un a nia (gol de Giuseppe Demarinis), i Giovanissimi à alincontra perdù col medemo resultat contra l’Ischia. I Esordienc “B” à perdù contra l Fersina 3a1. Chesta sabeda ai 8 de oril da les cinch , i Arleves jia a Dimaro contra la Solandra e i Esordienc “B” a Madrano contra l’Oltrefersina. Sa Vich jia i Esordienc “A” contra l Civezzano da les cater e i Giovanissimi contra l Telve da les sie.

Despièsc fèr a saer che I Esordienc “A” che i aessa cognù jièr sabeda passèda de contra a la Monti Pallidi, n’outa rué a Moena i à cognù vegnir de outa, ajache i alenadores de la squadra de Moena no i se à entopà de avisèr i picui jiadores che se jièa, per l gran despiajer sessaben de duc i bec. Situazion chesta che purampò no l’é la soula. Defati ence la pruma squadra de la sociazion da Moena, te chest campionat d’aisciuda, jà per desvaliva outes no la se à prejentà a la partides fora de val. L’é na costion che segur no dèsc luster al sport fascian per la cala se cogn vardèr de troèr na soluzion. Per l ben di bec e joegn.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close