ORTIGARALEFRE – FASSA 8 OTTOBRE 2017

Ortigaralefre – Fascia  1 – 0

Formazion del Fascia: Colusso Alessandro, Bernard Manuel, Debertol Cristoforo, Deflorian Giovanni, Cincelli Patrick, Lorenz Matteo, Rasom Sebastiano, Riz Gianni, Toma Nicolas (25’ p.t. Zanoner Dimitri), Cigolla Patrizio (30’ s.t. Riz Gabriele), Kola Pietro.

Se aon lascià la setemèna passèda dijan che l Fascia, te la partida contra l Verla, aea fat n burt vèrech endò e che te la domenia che vegnia, i joegn ladins aessa cognù troèr da nef l giust troi. Emben, vardan l resultat se podessa pissèr che l troi no l’é stat troà, ampò no l’é coscì. Enceben che l resultat de un a nia per i valsuganoc de Grigno lascia i fascegn amò zenza ponc, chel che se à vedù te ciamp enstouta l’é dut auter a respet de chel fat veder set dis dant.

No passa nience diesc menuc che l Fascia ciapa l gol de gra a na bela jièda del fort atacant de cèsa che, se cogn dir, à dat desvalives cruzies ai defensores del Fascia tei prumes carantacinch menuc dant de se chietèr mingol via tel secondo temp. Partida donca sobito sun erta per i bec del President Ghetta, che ampò no i se à petà jù e pian pian à proà a meter ensema vèlch jièda ence se i aversaries no i à mai molà palesan de no esser belche sunsom la clasifica per nia.

Enstouta la gaissa e la voa de se dèr jù no la é mencèda, alincontra l’é stat proprio la gran voa de no molèr mai che à portà l joen da Vich, Matteo Lorenz, a se ciapèr doi cartelins śai te cinch menuc, giusta dant de la fin del prum temp. Doi fai no catives ma che l diretor de jech à valutà de sanzionèr. Na dezijion mingol rigorousa ma fosc no deldut falèda. Da man de Matteo mingol de pecia esperienza te chesta ocajion, ampò l’é da chisc picui erores che se empèra.

Chest à però portà l Fascia a cogner se jièr dut l secondo temp con n om de manco. Ma l’é proprio da coche l grop à jià chesta seconda pèrt de partida che ne fèsc dir che l troi giust l’é stat troà ajache enceben de diesc contra unesc, i fascegn no à molà nia, coran dutintorn e se didan un co l’auter. Sessaben che vèlch tedò se à ence risćià, ma Colusso à fat semper bona vèrda, e con mingol de bona sort en più, se aessa podù e fosc vadagnà ence l gol de la parità. De fat, te i ultimes diesc menuc, soraldut de gra a la svelteza de Gabriele Riz, i nesc atacanc à abù dotrei bela ocajions per trèr l balon te usc ma l’é semper stat zachei che de n vers o de l’auter à rebatù la trates.

L moment no l’é segur sorì e ge vel prest fèr mingol de ponc ampò se chest l’é l spirit del grop da chiò inant, no se pel esser che fidenc.

Chesta domenia contra l’Auta Anaunia sul ciamp de Vich da mesa les cater, l Fascia se jiarà na endesfida dassen emportanta contra na formazion de medemo livel.

Mingol de fadìa l fin de setemèna passà i l’à fatta ence la i Arleves e la Juniores che à perdù per 4a1 contra Telve e Verla. Alincontra bie suzesc per Giovanissimi, 2a0 contra l Mezzocorona e Esordienc “A” e “B” contra Garibaldina e Fiem.

Chesta sabeda la Juniores jia a Vich contra l’Albian da mesa les set, i Giovanissimi a Pancià contra l Fiem da les cinch e a la medema ora i Esordienc “A” a Masen di Giovo contra l Verla. N’ora dant, da les cater sa Vich i Esordienc “B” jia l derby contra la Dolomitica. A serèr sù la partides de la squadra mendres, i Arleves che domenia da doman da mesa les unesc, jia a Villa Agnedo contra l’Ortigaralefre.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close