GARDOLO – FASSA 5 MARZO 2017

Gardolo – Fascia  1 – 0

Lorenz Manuel, Bernard, Trottner, Deflorian Gio., Dellafior, Debertol, Porcu, Pezzei, Lorenz Matteo (35’ s.t. Petrone),  Cigolla (30’ s.t. Zanoner), Deflorian Giu. (10’ s.t. Kola).

Nia da fèr ence enstouta per l Fascia Balon che ampò jian dassen delvers de contra a la seconda del campionat à lascià l ciamp de Melta de Gardolo zenza nience n pont. Resultat, l’un a nia, che dèsc rejon ai parons de cèsa che ampò a la fin de la endesfida l’é i prumes a fèr scïorìes ai ladins per la bela partida jièda, dijan che aldò del jech palesà, l post junfon la clasifica no l’é chel giust per l Fascia.

Paroles che bensegur fèsc piajer e che da na man fèsc ence entener de coche la sajon sie dassen desgrazièda aldelà de duc i demeric fascegn, purampò no serf a se trèr sù te la clasifica e ades, ence se l’é trist da dir, più che l bon jech serf i ponc.

La partida é stata balanzèda per duc i nonanta e passa menuc jié, col Gardolo che  fort de la posizione e del jièr en cèsa à scomenzà mingol miec ma zenza troèr gran soluzions dedant. L Fascia de contra proea a dèr vèlch cruzie ai forc defensores trentins, jian bala jabas mencian però de preziojion te i ultimes trenta metres.

L’episodie che à dat direzion a la endesfida rua dintorn l venteisem menut canche su na trata dal cianton da  n biteboi de giames te mesa area l’é sutà fora n balon zenza gran pretenzion che ampò dant de ruèr te usc, l’à smacà sul jeneie de n defensor ladin metan forajech l portier da Vich, Manuel Lorenz, che nia à podù.

La formazion de Fascia no la se à trat jù e pech dò à abù na gran ocajion per troèr l gol de la parità: trata da cet de Dellafior che l portieri de cèsa no bloca. L più asvelt a jir su la bala l’é Cigolla che ampò da pec metres no troa l pieie de l’usc trajan l balon tel ciel.

L prum temp se sera sù coscì zenza autra ocajions ma con l joegn Matteo Lorenz, l mior te ciamp, e compagnes che creit de poder drezèr l’èjit e ponta via i secondi carantacinch menuc de jech, proan amò n’outa a se trèr inant jian bala bassa  ge coran dò a duc i aversaries con gran gaissa.

Sessaben che per chierir de troèr l’un a un vèlch spazie ai trentins per i contrataches g’é stat lascià ma la miora ocajion les é ruède amò sui piesc dei jiadores del President Ghetta. Dant Cigolla che no à troà l giust slinch aldò de na trata da cet jièda coran da Debertol che l lo aea metù soul dedant usc, dò co na trata da dalenc de Dellafior che l portier no à tegnù ma olache i atacanc Kola e Zanoner no i se à fat troèr vertesc.

Da segnalèr che i ultimesc menuc l Fascia à ence jià de diesc per l’espulsion de Porcu aldò de doi cartelins śai. Aboncont ence co l’om demanco i fascegn à seghità a spenjer.

Ampò al triple scìgol del diretor de jech l resultat l’era chel dezidù dal gol del prum temp che ge lascia al Fascia l braus te bocia ma ence la convinzion che jian coscì ence i resultac no pel auter che ruèr.

Chesta domenia, ai 12 de mèrz, vegn jià la pruma partida sul ciamp de Vich da les trei de contra a l’Ortigaralefre, n’auter aversarie zach ma segur de valuta mendra respet a Calceranica e Gardolo. Enceben zenza dotrei jiadores scalifiché o demez, l Fascia cogn vadagnèr i trei ponc.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close