FIEMME – FASSA 6 novembre 2016

Fiem – Fascia 4 – 1

Cincelli, Bernard, Debertol (15’ s.t. Lorenz Matteo), Deflorian Gio., Dallio, Porcu, Petrone, Dellafior, Pezzei (43’ s.t. Bernard F.), Cigolla, Toma (35’ s.t. Deflorian Giu.)

Nia da fèr ence enstouta per la formazion de Fascia che tel derby contra l Fiem à perdù per cater a un sul ciamp de Cavaleis. Ampò, enceben che se pèrt semper con chela de venjer, a desferenza de la ultima partides olache se cognea fèr dassen miec, na desfata contra l Fiem se la podea ence meter en cont, ajache i fiemaces chest an i à na formazion dalbon forta e la clasifica, olache i é prumes da soi, l lo palesea.

L’é n moment negativ per la squadra del president Ghetta  che apede i erores che no mencia mai a ogne partida, i con scombater ence co la malasort. Emblematich l’é veder Debertol cogner lascèr l ciamp per aer ciapà na gran peèda te la costes da n compagn de squadra. Chest fat à condizionà n muie l’èjit de la endesfida ajache mister Bernardin, mencian ence Trottner e Gaspari, se à troà al chindejeisem del secondo temp zenza defensores e à cognù modelèr i unesc te ciamp a na vida mai proèda dant. L nef schierament à metù en dificoltà i ladins che te n chèrt de ora, i à ciapà l terzo e l quarto gol e à risćià de n ciapèr de etres.

Dant del gran mudament la partida la era stata ence piutost equilibrèda. L prum temp fenì un a un, aea vedù l Fascia jir en vantac de gra a na bela trata da cet de Porcu. I parons de cèsa ampò aea troà sobito l pont de la parità con na bela trata del Laforgia che però dant de tirèr, à sutà a na vida zis massa sorida, sie aversarie. Te l rest dei prumes carantacinch de jech, l Fiem aea fat valer l più aut tas tecnich dei zenterciampisć tegnan de più la bala, ampò de ocajions se n’à contà n par per pèrt.

Al scomenz del secondo temp, l Fiem se à trat mingol più inant troan dò set menuc la trata dai unesc metres aldò de n fal de Porcu su Turrini. Cincelli trefa la direzion ma la trata de Varesco la é massa secia per esser blochèda e coscì la se ficia te usc. Ciapà l gol, Cigolla e compagnes à proà sobito a reagir troan na gran ocajion con Porcu che à vedù sia trata vegnir rabatuda dai defensores giusta dedant usc. De chel che l’é vegnù dò, aon jà scrit.

L cater a un finèl no lascia gran interpretazions se no chela che te la cater partides che mencia l Fascia cogn fèr dededut per portèr a cèsa più ponc che l’é meso. A scomenzèr da la senestra endesfida de chesta domenia, da mesa les cater, endò en trasferta sul ciamp de Borgo.

Se la pruma squadra no la venc, a dèr sodesfazions l’é la squadra mendres che porta a cèsa trei ventes su trei, coi Arleves 3a0 col Sopramonte, coi Giovanissimi 4a2 col Valsugana e coi Esordienc “A” 2a1 col Oltrefersina.

Chesta sabeda, ai 12 de november, i Arleves jia a Vich da les sie contra l Verla e i Esordienc “A” a Bedollo da les cater contra l Piné. Domenia ai 13, i Giovanissimi jia a Albian contra l Valcembra da mesa les unesc e i Esordienc “B” a Vich da mesa les unesc contra l Lavis.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close