FASSA – TELVE 26 MARZO 2017

Fascia – Telve 0 – 0

Lorenz, Bernard, Trottner, Deflorian Gio., Dellafior, Debertol, Porcu, Pezzei (35 s.t. Dallio), Amplatz, Cigolla (35’ s.t. Zanoner), Toma.

N pont vadagnà o doi perdui? L’é chesta la domana che se fèsc i ladins a la fin de la endesfida de domenia passèda, serèda sù col resultat de parità zenza goi, dal Fascia contra l Telve. La resposta giusta no se sà coluna che l’é ajache i jiadores fascegn, tant tel prum temp che tel secondo, à abù de bona ocajions per trèr l balon te usc, ampò da l’autra man, ence i valsuganoc no i é stac da de manco e à abù dotrei ocajions per jir en vantac. La pruma sortida d’atach la é stata proprie dei ghesć che à desfrutà de mingol de pecia concentrazion da man de la defendura fascèna per sprigolèr i parons de cèsa. Ladins che ampò no se à lascià fèr jù e à troà sobito l met de fèr entener ai aversaries che no fossa stat scì sorì. Pecià che la trata de Amplatz la é fenida auta de pech e vèlch menut più tèrt, aldò de na trata dal cianton, l diretor de jech no à vedù n fal su Trottner che fossa stat neto na trata dai unesc metres. Dant de la fin dei prumes carantacinch de jech l’é da segnalèr na bona ocajion per l fort atacant Micheletti che mana fora de pech na trata de cianch e doi remenac auc ciapé da posizion senestra de Trottner e Toma. Resultat dai vegeres donca al carantacincheisem ma che no lascia entener de tant feruscola sie stata la endesfida. L secondo temp scomenza delvers per l Fascia che palesea la voa de vadagnèr i trei ponc proan sobito a spenjer jian d’atach, no troan ampò l vèrech giust e canche i lo troa, a dir de no l’é l portier valsuganot che dant su na trata da vejin de Amplatz e dò su n par de trates dal cianton l se fèsc semper troèr ascort. Gaissa ladina che la se destuda mingol a la metà del secondo temp canche su na trata da mezciamp l Telve per pech no troa l’eurogol, con Lorenz che per blochèr la trata l smaca sul remenat se lascian coscì sciampèr de man la bala che la ge rua sul cef a l’atacant ghest che ampò, l se fèsc ciapèr la rebatuda dal medemo Lorenz che da enjeneià sera l’usc. Mingol per la sperduda e mingol per l strach, Porcu e compagnes i se tira endò lascian ciamp ai aversaries purampò zenza mai lascèr alò de scombater e, proprie ti ultimes momenc de la partida sui piesc de Zanoner l’é ruà la miora ocajion del Fascia, falèda malamenter per n dribbling de massa. Proprio chesta gran ocajion a la fin, fajessa dir che l zero a zero l’é doi ponc  perdui ma a esser onesć se cogn dir che la parità l’é l resultat giust. Apede chest, la desfates de Cauriol, Dolomitica e Vattaro no pel fèr dir auter che chest sie dassen n pont vadagnà.

Chesta domenia, ai doi de orìl, l Fascia proarà a jir inant coi resultac positives de contra al Piné, a Bedol da les cater.

Per chel che vèrda i resultac de la squadra mendres, seghita a schicèr duc chi che ge passa dedant la formazion di Arleves che ence enstouta à batù 6a0 l Mezzocorona (4 goi de Garbriele Riz e un per om de Julian Aleksi e Daniele Brunel). I Giovanissimi alincontra à perdù 3a2 contra l Mattarello (2 goi de Samuele Ruggiero), te la endesfides co la squadres de Fiem, i Esordienc “A” à parejà contra la Dolomitica e i Esordienc “B” à perdù contra l Fiem.

Chesta sabeda, i Arleves jia contra l Lavis fora de cèsa da les sie, i Giovanissimi a Vich a la medema ora contra l’Ischia e i Esordienc “A” a Moena contra la Monti Pallidi da les cater. Domenia da mesa les unesc, i Esordienc “B” jia sa Vich contra l Fersina.

 

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close