FASSA – PINE’ 16 OTTOBRE 2016

Fascia – Piné 3 – 3

Cincelli, Bernard, Trottner, Deflorian Gio., Gaspari (1’ s.t. Porcu), Petrone, Debertol, Pezzei, Cigolla (44’ s.t. Lorenz M.), Toma, Hazizi

No l’é ruà la venta che duc spetèa te cèsa Fascia, ma no l’é ruà nience na desfata e, chi che en domenia passèda l’era a veder la partida su la tribunes del Cotura de Vich, se à seguramenter godù, ajache l’é stat na endesfida dassen spetacolèra e averta enscin a la fin a ogne resultat.

L Fascia ponta via mingol spevech e i pinaiteres no se lascia sciampèr l’ocajion per se trèr sobito inant e schicèr i parons de cèsa te sie mezciamp. L’é vint menuc de padiment per Debertol e compagnes che no rua a fèr jech. Dò n chèrt de ora olache la prescion di ghesć no aea ampò portà de gregn risesc per l’usc fascian, l’é ruà l scìgol del diretor de jech a comanèr la più grana ocajion per l Piné, na trata dai unesc metres per n fal de man de Toma. Fontana se prejenta sul dischet ma l vegn ipnotisà da Cincelli che dò chel de Telve, bloca ence chel del Piné.

La gaissa del portier ladin dèsc mingol de animo ai compagnes che pech dò troa l gol de vantac de gra a na azion de Hazizi, asvelt tel strent a sutèr i defensores e a tirèr te usc.

L’un a nia dèsc forza ai bec de cèsa che pec menuc più tèrt i va vejins al secondo gol co na trata da cet de Debertol, auta de n nia e n’autra bona ocajion sui piesc de Hazizi. Ampò sul più bel per l Fascia, l Piné con doi contrataches, dant ciapa l remenat aut e sobito dò fèsc ite l’un a un che sera sù l prum temp.

Fora dai deregoladoes l Piné se porta sobito dedant tel resultat aldò de na azion mingol desodia: trata lengia de la defendura pinaitera, Cincelli vegn fora da l’area a rebater l balon de cef che ampò l rua sul pé de Fronza che de sgol da trentacinch metres troa la trata del doi a un. L Fascia no se peta jù e scomenza a majenèr jech schician i aversaries e metan ensema de bela azions. L doi a doi rua belebon prest de gra a na trata da cet de Toma che de cianch lascia cet l portier. Troà la parità, la gaissa la é duta da la man dei ladins che sent de poder venjer la endesfida. Ma desche sozedù tel prum temp, tel mior moment de na squadra, a fèr ite l gol l’é l’autra, e coscì à troèr l vantac l’é endò l Piné con Fontana. Ampò i joegn de cèsa no i ge stèsc e nience doi menuc dò, na bela azion portèda dant da Trottner, la vegn serèda sù sche miec no se podea da Pezzei che pech più tèrt aessa abù ence la ocajion per fèr ite l cater a trei, falan ampò soul contra l portier.

Al triple scìgol la squadres les se porta a cèsa un pont per om, fosc con vèlch recor ma nience massa, per na partida jièda zenza tema, vis a vis.

Per la pruma venta se cognerà spetèr l prum derby de la sajon, chesta domenia de contra a la Cauriol, da mesa les cater sul ciamp de Juan.

De bela ventes le ruà enveze da la squadra mendres: 3a1 dei Arleves contra la Solandra (goi de Gabriele Riz, Sebastiano e Dennis Rasom), 7a1 dei Giovanissimi contra l Telve (trei gol per om de Massimo Lorenz e Samuele Ruggiero, un de Mattias Rosso). I Esordienc “A” à vent 3a0 contra la Dolomitica, i Esordienc “B” à perdù 3a1 contra l Fiem.

Chest fin de setemèna, i Arleves jia a Trent contra l Cristo Re, domenia da mesa les unesc. I Giovanissimi jia sa Vich contra la Dolasiana, sabeda da les sie. I Esordienc A e B, jia sabeda a Meano contra la Dolasiana da les cinch e domenia a Vich da mesa les unesc contra l Bolghera.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close