Fassa – Gardolo 18 settembre 2016

Fascia – Gardolo 0 – 0

Cincelli, Bernard, Trottner, Deflorian Gio., Dallio, Debertol, Pezzei, Petrone, Toma, Cigolla (30’ s.t. Azizi), Deflorian Giu. (25’ s.t. Lorenz Matteo).

Seconda partida e secondo resultat dai vegeres per l Fascia Balon, che dò l Calceranica tegn a bocia suta ence la forta formazion de Gardol. Zenz’auter se pel dir che ence i ladins i é resté a bocia suta ajache balons vindò la schena del portier ghest no n ‘é rué, ampò chest resultat, desche chel arjont te la pruma endesfida de campionat, per l Fascia l’é bon, seguramenter più che per i etres.  Esser contenc de doi parejes l’é mingol pech, aboncont se cogn sumèr duc i fatores per fèr conscidrazions che abie valor e a fèr chest ne deida la paroles de mister Bernardin che dò la partida l se palesea positif: “No se pel sconer che soraldut tel secondo temp aon padì e no aon beleche mai proà a jier la bala, ampò son content de aer porta a cèsa n’auter pont contra una de la squadres più fortes del campionat, no ge lascian fèr ite nience n gol. Soraldut se pisson a la condizion senestra che ence chesta domenia aon abù: Porcu malà, Dellafior demez, Cigolla, Debertol, Deflorian Giuseppe e Trottner che no i stajea delvers. Situazion chesta che no dèsc l met de esser ence bie tel jech”. Bel tel jech de segur l Fascia no l’é stat, ampò bel l’é stat veder desche i joegn de cèsa no abie fat n pas endò e i se abie dat jù fin a la fin per defener chel picol pont. Dassen bel l’é stat mirèr l’union del grop che se deida ence e soraldut canche la robes no les va a la miora vida possibola.

L prum temp l’é stat belebon balanzà coi trentins  che proèa a se fèr inant su la man cencia ladina col fort Marin, che più che n’outa à sutà Dallio no troan ampò la giusta trata o l giust passaje. La miora ocajion dei ghesć la é ruèda a la mesora de gra a na trata da dalenc de Mici olache Cincelli é stat però ascort e asvelt a sutèr envers l remenat blocan la trata. Tei prumes carantacinch menuc ampò ence l Fascia se à fat veder inant con Beppe Deflorian che più outes à proà la trata da dalenc zenza troèr l’usc e per pech no l’é ruà col cef su na gran jièda de Cigolla che aessa bastà la tochèr per la ficèr junfon la rei.

La seconda frazion de jech enveze la é stata duta dei trentins coi fascegn che mingol a l’outa à cusà i malans e se à trat endò, se defenan semper con orden ma no troan mai l met de jièr bala jabas e, sessaben, i joegn de cèsa, da Toma a Pezzei, da Deflorian al nef joegn da Busan, Azizi, no i é proprio dei palanc e coscì ogne bala trata sù da Cincelli, vegnia metuda jù e jièda dai jiadores del Gardol che semper con l duo Mici-Marin à metù ensema n par de bona ocajions blochèdes a outes dai defensors e a outes dal portier da Vich.

L resultat finèl fosc l’é mingol strent per i ghesć ma segur no l’é stat robà da la squadra del president Ghetta, alincontra, l’é stat vadagnà co la fadia e la gaissa. Che no sie stat n bel Fascia se pel l dir ma, desche se disc, dal bel no se magna e vèlch outa paa la speisa esser burc ma percacenc.

Chesta pruma doi partides les era dalbon senestres, contra doi squadres de valor, e esser passé fora zenza desfates l’é n bon ejit. Bensegur ades, contra formazions de livel manco aut,  dal Fascia se se spèta ence i trei ponc e n jech più propositiv. A scomenzèr da chesta domenia, ai 25 de setember, contra l’Ortigaralefre, sul ciamp de Grigno da mesa les cater.

La setemèna passèda à jià ence i Giovanissimi, perdan 3a1 (gol fascian de Massimo Lorenz) proprio contra l’Ortigaralefre. Giovanissimi che proarà a sè rifèr chesta domenia a Baselga de Piné da mesa les unesc contra l Piné. Chesta sabeda ponta via ence l campionat di Arleves, sul ciamp de Vich da les sie contra la Vipo Trent.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close