FASSA – DOLOMITICA 26 novembre 2017

Fascia – Dolomitica 3 – 0 (goi de Rasom Lorenzo, Debertol Cristoforo, Riz Gabriele)

Formazion del Fascia: Colusso Alessandro, Bernard Manuel (45’ s.t. Rasom Pierpaolo), Toma Nicolas (40’ s.t. Cincelli Federico), Deflorian Giovanni, Trottner Luca, Lorenz Matteo, Cigolla Patrizio, Debertol Cristoforo,  Rasom Lorenzo (20’ s.t. Pezzei Michael), Zanoner Dimitri (30’ s.t. Kola Pietro), Riz Gabriele.

Tant braussa la saor de na gran desfata desche tant doucia la saor de na gran venta. E l Fascia, te set dis l’é passà dal fiel a la miel, da una de la più burta partides de i ultimes egn a una de la più bela ventes.

Dir chest tant podessa someèr a zachei na ejagerazion ampò la endesfida de domenia passèda contra la Dolomitica la sconea desvalives segnificac. Dant de dut perché l’é n derby e desche se sà, n derby no l’é mai na partida desche l’autres. De più, contra la formazion da Pardac, i ladins à da semper fadià n muie e l’era da desvalives egn che i trei ponc no i se li tolea la squadra del President Ghetta. Apede chest se cogn ence dir che jà Pardac duc aea jà dat la partida per venta e che na desfata contra chest Fascia no la era nience da tor en conscidrazion. Da man dei bec de mister Chelodi dapò l’era ence dotrei situazions da meter a post: desmostrèr che l Fascia no l’era chel vedù sul ciamp contra l Piné, venjer zacan na partida dedant a la propria jent e tinùltima ence vardèr de no restèr massa en jù te la clasifica.

Donca, per Debertol e compagnes, l’era n prossach pien de bona rejons per venjer la partida che fosc i prumes menuc à fat sentir l peis su la schena dei jiadores de cèsa che à conzedù n par de ocajions ai atacanc ghesć che dintorn l diejem menut à ciapà l remenat co na trata da cencia a dreta. Dò chest picol spaent, l Fascia se à però trat inant e dò esser jic apede l vantac co na trata da cet de Debertol batuda coran, dintorn a la metà del prum temp l’é ruà l gol de Lorenzo Rasom che à serà sù na bela azion su la man cencia de Zanoner e Riz con chest ultim che à trat na gran bala dedant usc, giusta da spenjer ite.

L vantac à dat da na man gaissa al Fascia che à scomenzà a jièr miec e da l’autra à portà mingol de nervosism anter i jiadores fiamaces che i se à inirà deldut canche a pech da la fin del prum temp, Zanoner  se à portà a spas tre defensores dant de ge passèr l balon a Debertol che da fora dei seidesc metres à trefà l cianton aut olache l portier nia à podù. Na gran trata per l doi a nia e duc al ciaut per la paussa.

Desche se podea pissèr, al scomenz del secondo temp la Dolomitica à proà a se trèr inant con l Fascia che se à trat mingol endò ma zenza mai conzeder ocajions, alincontra jan en contratach canche possibol. Proprio te una de chesta sortides i jiadores de cèsa à troà l terzo gol. Trata da cet de Lorenz rebatuda da la parèda e bala che rua tei piesc de Cigolla che de pruma fèsc ruèr l balon a Gabriele Riz, lascià soul giusta ite de l’area su la cencia. Stop de jeneie e maraveousa trata de sgol che lascia amò n’outa de sas l’ultim defensor pardacian.

L trei a nia de fat sera sù l’èjit de la endesfida ence se sobito dò l gol fascian, de gra a n gran jiador desche Brigadoi, jà atacant del Fascia acà n pec de egn e dassen l soul jiador aversarie a dèr vèlch cruzie, la Dolomitica aessa l met de scurtèr l svantac co na trata dai unesc metres vadagnèda apontin dal “Briga”, ma l zenterciampist Luceri l se fèsc ipnotisèr da Colusso che dant co la mans e dò col pé peta l balon dalenc da l’usc metan definitivamenter la parola fin a chesta partida.

Dalbon na bela venta donca che à vedù duc i jiadores fascegn se dèr jù desche semper se cognessa fèr e na gran sodesfazion ence per mister Chelodi che à vedù se paèr fora la fiduzia data ai joegn metan te ciamp te na partida tant emportanta e senestra, cater doimile e un nonantanef. L soul aspet negatif, l cartelin ros ciapà da Kola a doi menuc da la fin per n picol biteboi co n aversarie.

Pecià perché te l’ultima partida del campionat de chest an, chesta domenia da mesa les trei contra l Spormaggiore, te n ciamp dassen senester, l gran fisich de Pietro aessa segur fat comet.

En cont de la squadra mendres, bon resultat de la Juniores che à vent un a nia contra l’Ortigaralefre, terzo en classifica. I Arleves à enveze perdù 6 a 1 (gol de Mattia Lastei) contra la Vigolana.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close