FASSA – BORGO 12 novembre 2017

Fascia – Borgo  0 – 3

Formazion del Fascia: Lorenz Manuel, Bernard Manuel, Cincelli Federico (30’ s.t.Cincelli Patrick), Deflorian Giovanni, Riz Gianni (1’ s.t. Cigolla Patrizio), Debertol Cristoforo, Lorenz Matteo (40’ s.t. Rasom Pierpaolo), Pezzei Michael, Rasom Sebastiano, Kola Pietro (20’s.t. Deluca Daniele), Riz Gabriele.

L’aane scrit la setemèna passèda che per fèr ponc te la endesfida contra l Borgo fossa servì n mez miràcol per l Fascia. La desferenza tecnica la era massa grana e i resultac dei valsuganoc dant de chesta partida rejonèa da soi: 9 partides, 9 ventes, 38 goi fac, 4 ciapé. Nesciuna squadra aea mai ciapà manco de trei goi. N resultat scrit donca ma che sul ciamp no l’é stat coscì sorì da arjonjer per i ghesć che à troà te la formazion de cèsa n aversarie zach che, saan de esser de n livel mender, à abù l’umiltà de fèr na partida de defendura se tolan a om i jiadores più forc e ge lascian pech post per la jièdes de atach. L prum temp l’é stat dut da man del Borgo che à schicià i ladins te sie mezciamp proan sobito a serèr la endesfida. Ampò, dò n remenat ciapà tei prumes menuc co na trata da man dreta, Bernard e compagnes se à defenù con orden zenza conzeder autra ocajions enscin a la mesora canche co na bela azion e mingol de bona sort su n par de ressauc, Caumo à troà l giust varech per l’un a nia. I joegn de mister Chelodi no i se à petà jù e à seghità a se defener delvers fin al carantacincheisem. De contra se cogn dir che se a defener no la é jita mèl, la fasa de atach la é stata deldut zompa con demò doi sortides inant zenza che vegnisse fora na soula ocajion.

Tel secondo temp la formazion de cèsa à proà a mudèr zeche, lascian da na man vèlch marcatura a om per fèr mingol più jech inant. L nef schierament tatich e vèlch mudament de jiadores con Cigolla e Deluca te ciamp, à segur didà l Fascia a meter ensema vèlch bona azion ence te la fasa de atach olache l’é ruà dotrei ocajions con Lorenz, Riz e Pezzei. A se spenjer inant sessaben vegn lascià più lèrga vindò e l Borgo no se l’à fat dir doi outes de se trèr tei spazies lascé vec dai fascègn metan ensema de bona jièdes ma la cobia de defenjores zentrèi de cèsa, Deflorian-Cincelli, à semper rebatù delvers. Pecià che su doi trates da cet, i jiadores de cèsa no i sie stac coscì ascorc desche te autra ocajions e i se abie lascià tor l temp dant da Dalsasso e dò da Ferrai che con trates de cef à petà l balon tedò la schena de Lorenz che dassen nia à podù.

L trei a nia l’é restà l resultat finèl che da na man à confermà la braura e la forza del Borgo ma che da l’autra no à revalutà negativamenter l’ultim bon meis del Fascia. Alincontra la bona prestazion en cont de gaissa e spirit coletif, no pel che esser na segureza ence per la partida de chesta domenia, da mesa les trei contra l Piné sul ciamp de Bedollo.

Per chel che verda la squadra mendres, zacan l’é ruà endò na venta de la Juniores, 1 a 0 contra l Solteri (gol de Julian Aleksi), i Arleves à perdù 6 a 1 contra l Valcembra (gol de Mattia Lastei) e i Giovanissimi à perdù 10 a 1 contra l’Anaune (gol de Franco Bogni). Ventes per la squadres di Esordienc A e B, contra Perjen e Fiem.

Chest fin de setemèna, la Juniores jia sabeda a Borgo da les sie, i Arleves paussa, i Giovanissimi per chest an i à fenì, i Esordienc “A” jia sabeda a Vich da les cater contra la VIPO Trent e i Esordienc “B” jia domenia da mesa les undesc a Masen di Giovo contra l Verla.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close