CIVEZZANO – FASSA 7 MAGGIO 2017

Civezzano – Fascia 0 – 0

Cincelli, Bernard, Trottner, Deflorian Gio., Dellafior, Debertol, Porcu, Lorenz, Pezzei (35’ s.t. Dallio), Cigolla (33’ s.t. Toma), Kola (10’ s.t. Zanoner).

Scì tanta bona ocajions per fèr gol e venjer, l Fascia de chest an te na soula partida no i les à mai abude, ampò al triple scìgol, su la notes del diretor de jech l’é segnà sù demò dotrei jiadores che à ciapà n cartelin śal e nia de più. De chisc tempes se podessa pissèr che l’é jà tant no aer perdù ma no esser stac bogn de venjer na endesfida, olache tout jù diesc menuc tel prum temp, se à semper tegnù l jech te man e se à creà beleche diesc oportunitèdes de trèr l balon te usc, l’é dalbon na desfata.

E l braus te bocia l’é fort proprie ajache no sozede da de spes de esser bogn de meter ensema sacotanta ocajions e chela pecia outes che la é coscì se cognessa se n emprevaler.

Apede chest, l’é ruà ence la venta del Vattaro che à coscì arjont l Fascia te clasifica al terzultim post.

Ma vegnon a la endesfida. Pronti via e l Fascia troa dò pech la pruma grana ocajion con Cigolla che lascià tedò l terzin se troa un contra un col portier de cèsa. L teren mingol iregolèr no deida l’atacant ladin e la trata che cognea esser bassa, la se auza giusta chel tant per smachèr contra l numer un en sortida. La pruma la é jita ma Pezzei e compagnes enten che su la man cencia se va ite sche tel smauz e le proprio chest ultim che troa dotrei inserimenc olache ampò mencia l’ultima tocèda. Ma la gaissa del Fascia no la se bloca e su na trata dal cianton l’é Bernard che de cef mana l balon de pech aut sora l remenat. A la metà del prum temp se fèsc veder inant ence l Civezzano che desfruta n moment de paussa de la prescion ladina per dèr vèlch cruzie a la defendura fascèna, ma Trottner, Deflorian e Cincelli fèsc bona vèrda.

I prumes carantacinch de jech se sera sù co la formazion dolomitana amò inant, enstouta su la man dreta olache ence Lorenz e Bernard no à mai lascià alò de spenjer, purampò zenza troèr l giust vèrech.

I bec de Fascia sà che l soul resultat che serf l’é la venta e ponta via l secondo temp con amò maora gaissa e determinazion del prum, schician jà dal scomenz i cermbrans te sie mezciamp e metan ensema una dò l’autra dassen de bela jièdes. Da dreta e da cencia rua te mez a l’area dei parons de cèsa na sfilza de balons che no spetea auter che esser spenc vindò la schena del portier, ma la trates de Pezzei, Porcu, Lorenz e Zanoner no troa mai l’usc. Te vèlch ocajion dassen no se sà co.

La lege del balon disc gol falà gol ciapà e proprie tin ultima su n par de contrataches, per pech no ruèa la befa più grana ma la defendura ladina no à mai molà blocan semper duta la pecia sortides ofensives di aversaries.

L resultat finèl, chel dai vegeres, l’é da na man dassen faus, se se tegn cont de chesta partida, ma da l’autra fèsc entener coluna che l’é stat la più grana dificoltà del Fascia de chesta sajon. Trèr l balon te usc. E sessaben che se no se slonfa la rei, ben che la vae se porta a cèsa demò n pont.

Chesta domenia sul ciamp de Vich, l’undesc del president Ghetta jia contra l Lona Lases da les cater.

Per chel che vèrda la squadra mendres, i Arleves à venciù trei a nia ajache i aversaries no i se à prejentà e chesta sabeda i jia a Masen di Giovo contra l Verla da les set. I Giovanissimi à vent 4a2 (goi de Massimo Lorenz 2, Samuele Ruggiero e Jannes Debertol) e i jia sabeda a Vich da les sie contra l Valcembra. I Esordienc “A” à vent 2a1 contra la Dolomitica e i jia a Vich contra la Monti Pallidi sabeda da les cater. I Esordienc “B” à perdù col Fiem 3a1 e i jia semper sabeda da les cater, a Perjen contra l Fersina.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close