CAURIOL – FASSA 23 ottobre 2016

Cauriol – Fascia 2 – 2

Cincelli, Bernard, Trottner, Deflorian Gio., Dallio, Porcu (30’ s.t. Dorich), Petrone, Debertol, Pezzei, Cigolla (35’ s.t. Toma), Hazizi.

A fèr e desfèr, se sà, no se va n muie dalenc. Purampò te chest moment la pruma squadra del Fascia Balon, no somea saer fèr auter che trèr demez ogne outa dut l bon che l’era stat metù en esser. E l’ultima partida de contra a la Cauriol l’é dassen l cajo più emblematich de chest.

De contra a na formazion de livel dassen mender e che aea ence vèlch jiador no disponibol, l Fascia à palesà per otanta menuc de esser na squadra più forta dei aversaries, desfan dapodò dut cant te i ultimes diesc menuc de jech. E pissèr che proprie dant de la partida, mister Bernardin, aea domanà a sie jiadores de jièr desche i sà, no demò per vint menuc o mesora ma per duc i nonanta menuc enscin al triple scìgol.

La endesfida scomenza sobita co na sortida inant dei parons de cèsa che i troa na bela trata olache Cincelli se fèsc troèr vertech. Per otanta mencu, la soula ocajion dei fiemaces. Dò, l’é demò Fascia. Una dò l’autra fioca la ocajions per i ladins, ma l prum temp fenesc zenza goi perché Azizi, Cigolla e Pezzei fala duta la trates ence la più sorides e la trata da cet de Porcu la se bloca sul remenat aut.

L dominie fascian l’é net e l se concretisea al scomenz del secondo temp canche Petrone fèsc valer sia forza su la man dreta e te cinch menuc peta te area doi trates che aea de besegn demò de esser tochédes per fegnir te usc. Su la pruma l’é Azizi a serèr de pé, su la seconda enveze l’é Cigolla de cef a tor l temp a defensores e al joegn portier fascian, Mirko Barcatta, che chest an l’é stat prestà a la Cauriol per poder jièr e se fèr i osc.

Per chel che se aea vedù te ciamp, l doi a nia no demò l’é n resultat giust ma l’é ence strent, soraldut per chel che suzede enscin al trentacincheisem menut, coi joegn de Fascia che seghita a meter sot i parons de cèsa ampò falan a dò dò ocajions dassen sorides.

Enceben che l terzo gol no ruèa, nia lascèa a pissèr chel che dapò l’é sozedù te i ultimes cinch menuc ajche la Cauriol l’era dalbon na squadra zenza vita. Purampò l Fascia de chisc tempes l’é bogn fèr renvegnir ence la squadres che no fèsc nia per renvegnir e coscì, su na trata da cet petèda te l’aria zenza pertenzion, Cincelli fala la preisa lascian l balon sul pe de Berlanda che poja l balon te l’usc lascià vet. No passa nience trei menuc e i fiemaces troa ence l doi a doi co na bela trata de Partel lascià seguramenter massa soul.

N pareje che fèsc più mel de na desfata e de segur no deida i ladins dal pont de veduda moral. Ampò no l’é temp de se petèr jù ajache jà chesta domenia l’é n’auter derby, de contra a la Dolomitica, sul ciamp de Vich da mesa les trei.

Chisc i resultac e la partides de la squadra mendres: i Arleves à vent col Cristo Re 3a0 (doi goi de Sebastiano Rasom e un de Gabriele Riz) e jiarà sabeda da les sie a Vich contra la Dolasiana. I Giovanissimi à vent  contra la Dolasiana 2a1 (goi de Samuele Ruggiero e Jannes Debertol) e jiarà domenia da mesa les unesc a Madrano contra contra l’Oltrefersina. Per i Esordienc “A” e “B” enveze una venta e una desfata contro Dolasiana e Bolghera. I Esordienc “A” jiarà sabeda da les cater a Vich contra l Gardol. I Esordienc “B” i paussa.

Il sito utilizza solo cookie tecnici. Tramite il sito sono installati cookie di terze parti. Chiudendo il banner, l'utente accetta l'utilizzo di tutti i cookie. più informazioni

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close